Почна изградбата на велосипедската и пешачката патека до штипската населба Балканска

Општина Штип денеска почна со асфалтирање на новата пешачка и велосипедска патека покрај река Брегалница. Градоначалникот на Општина Штип, Илчо Захариев рече дека патеката во должина од 3.5 километри, а  започнува од населбата „Осми ноември“ и ќе се асфалтира до населбата Балканска. Во следна трета фаза ќе се постави асфалт и на тампонираниот дел до населбата Караорман.

- Патеката зад Исарот која ја направивме пред две години почнува токму од тука, а сега со новиот зафат, одиме во горниот тек на Брегалница кон населбите „Македонка“ и „Балканска“. Но, оваа патека нема да биде важна само за жителите од овие населби, туку за цел град, бидејќи покрај постоечките два километри, сега асфалтираме уште 3.5 километри од патеката. Мислам дека овозможуваме услови за рекреација и велосипедизам и ова е проект кој е важен за градот, вели Захариев.  

Тој најави дека по завршување на уредување на коритото на река Отиња во центарот на Штип, каде останаа уште 200 метри до влезот во Брегалница, ќе започне уредување и на кејот на Брегалница.

- Од влезот на реката во „Осми ноември“ па до бањата Кежовица ќе биде уредено коритото по теркот на река Отиња, значи ќе има ѕидови од двете страни со цел да се прошири коритото, но и да се заштити се она што е направено од можно излевање на реката. По принципот на уреденото корито на реките, кое го има во поголемите градови не само во Македонија туку и пошироко, имаме намера да почнеме со овој проект со што конечно ќе се среди и коритото на Брегалниц, вели Захариев.

Проектот  се финансира со средства од локалната самоуправа кои според Захариев не се големи, но истиот ќе има траен ефект врз уредувањето на реката и нејзиното доближување до граѓаните.