Македонија
5. October 2019 - 16:43

Ројтерс: Датум за Македонија, но не и за Албанија - првата меѓувладина конференција до крајот на 2019.

Датум за преговори за Македонија, но не за Албанија. Според новинската агенција Ројтерс, Германија предлага одвојување на двете држави, во обид сите земји членки да постигнат компромис на 15-ти октомври.

“Според планот предложен неделава до министрите на 28-те земји членки кои треба да дискутираат кон средината на октомври е можен компромис помеѓу оние се обидуваат да ги приближат балканските земји до ЕУ и оние кои пружаат отпор како Франција, Холандија и Данска”, пишува Ројтерс.

Агенцијата потсетува дека Германија пред неколку недели гласаше за почеток на преговорите со Македонија и сo Албанија, но со дополнителни услови за Тирана.

Во нацрт-заклучоците на Советот на министри се предлага земјава да ги почне преговорите пред крајот на оваа година, но не и Албанија.

Драфтот вели:

„Со оглед на постигнатиот напредок, ЕУ одлучува да започне пристапни преговори со Северна Македонија“, и додава дека првата меѓувладина конференција односно првиот состанок помеѓу земјата аспирант и ЕУ“треба да се одржи до крајот на 2019-та“.

Иако начелно нацрт-заклучоците предвидувале иста реченица и за Албанија, таа е отстранета во последната верзија и не се предлага датум за првата меѓувладина конференција со Тирана.

ЕУ дипломат, меѓутоа, за Ројтерс вели дека усвојувањето на овие заклучоци ќе зависи од Франција, каде одлуката ќе ја носи лично Емануел Макрон.

Текстот нагласува дека Холандија, друга земја со големи резерви кон проширувањето, е повеќе наклонета кон Северна Македонија отколку кон Албанија.

Иако е предвидено одлуката да се донесе на 15-ти октомври во Луксембург, не е исклучено досието да се префрли на самите шефови на држави и влади каде Меркел и Макрон ќе се обидат да постигнат компромис. Ројтерс пишува дека две опции се можни - едната е да се дадат дополнителни услови пред да започнат преговори, другата е да се одвојат Северна Македонија и Албанија.