Македонија
29. јуни 2020 - 15:02

Се изготвува извештај од распитот на Ден Дончев, ќе биде доставен до ОЈО

Министерот за внатрешни работи Наќе Чулев на прес-конференција соопшти дека во моментов се изготвува соодветна службена белешка, односно извештај за Ден Дончев кој во текот на денешниот или утрешниот ден ќе биде доставен до Основното јавно обвинителство.

Прашан дали е готов извештајот од распитот на Ден Дончев и кога ќе биде испратен до Обвинителството, Чулев ја објасни постапката. – И Ден Дончев како функционер, врз основа на повик од Јавното Обвинителство до Управата за финансиска полиција и министерот за внатрешни работи, ние постапивме. Ден Дончев беше повикан како поранешен функционер во Владата. Беше извршен разговор со него со цел добивање податоци и информации во врска со објавените снимки на кои се гледа како тој зема финансиски средства. Колегите од Одделот за сузбивање организиран и сериозен криминал извршија разговор во траење од околу 40 минути, рече Чулев.

Дончев, како што рече, беше во придружба и на бранител, адвокат.

Министерот Чулев рече дека чекаат дополнителни насоки од Обвинителството. Најави доколку има потреба, МВР ќе постапува и во идни случаи на јавно објавени снимки ако, како што рече, оценат колегите дека постојат елементи за кои треба учесниците на евентуалните настани да бидат повикани на разговор.