Македонија
8. February 2017 - 13:13

Средба на Груевски со турската амбасадорка Кара

Претседателот на ВМРО-ДПМНЕ Никола Груевски заедно со секретарот за меѓународна политика на партијата Александар Николоски денеска остварија средба со амбасадорката на Турација во Македонија Еркал Кара.

Како што соопшти ВМРО-ДПМНЕ, средбата се одржала на барање на амбасадорката која истакнала дека за Турција како верен и постојан пријател на Македонија важна е стабилноста на државата, и оти Турција е тука доколку може да помогне и доколку постои  потреба за тоа. 

Груевски нагласил дека со Република Турција имаме одлични односи и изразил уверување дека ќе се надградуваат. Посочил дека се цени поддршката која ја дава Турција особено на планот за интеграција во НАТО алијансата.

- Во поглед на внатрешните случувања од ВМРО-ДПМНЕ беше посочено дека се соочуваме со политичка криза и зад нас како држава е еден тежок период во кој се случија работи кои очигледно долго се подготвувале со одредена помош на надвореши центри, што патем речено и беше директно отворено соопштено од Зоран Заев на средбите кои во предвечерјето на кризата тој ги имаше со Никола Груевски кога го уценуваше со објавување на илјадници креирани материјали, нешто што и целата јавност го виде. Во продолжение беше посочено, дека после се, повторно следеа фер и демократски избори на кои ВМРО-ДПМНЕ доби нов легитимитет на избори кои никој не ги оспори, иако беа очигледни одредени влијанија кои помагаа на одредени субјекти во годината пред изборите, се вели во соопштението.

Потенцирано е дека ВМРО-ДПМНЕ освои најголем број гласови и мандати и, како што е наведено во соопштението, сега имаме ситуација каде имаме обид тоа да се изгира,и оти  тоа не е добро за државата, создава нови кризи и затоа во партијата се смета дека е зрела ситуацијата за нови избори“.

Се посочило дека во првите 20 дена од доделувањето на мандатот партијата имаше разговори за формирање на коалиција со ДУИ. Во тој период, соопштуваат од ВМРО-ДПМНЕ, беше очигледно дека имаше вмешување на надвореши фактори вклучувајки и соседни земји што резултираше со изработка на нова платформа на албанските партии.

- Македонија има рамковен договор кој беше договорен во 2001-та година со посредство на меѓународната заедница која, како и сите инволвирани страни, во целиот изминат период нагласуваше дека не постои можност за негово репреговарање. Оваа платформа се чини дека е токму тоа, и вистинското име на платформата е всушност обид за репреговарање на Охридскиот рамковен договор. Меѓународната заеднца ја презема улогата да биде еден вид гарантор на Рамковниот договор. Затоа ВМРО-ДПМНЕ нагласува дека  Постапката за репреговарање на Охридскиот рамковен договор, преку форма наречена Платформа  може да предизвика други етнички заедници да излезат со свои платформи, односно свои барања за репреговарање на договорот од Охрид, се вели во соопштението.

Се додава дека ВМРО-ДПМНЕ одбиле да преговараат за платформата во разговорите со ДУИ со цел, како што соопштуваат, да не се донесе земјата во уште посложена ситуација, а имајќи предвид дека повторното преговарање на Охридскиот рамковен договор е всушност отворање на пандорина кутија. 

- Од партијата исто така беше потврдено дека СЈО треба да ја работи својата работа професионално, а не како марионета на СДСМ и други надворешни центри и согласно договорот од јуни - јули 2015-та, без негово менување, вклучувајќи и без негово продолжување. Притоа беше нагласено дека не е точно оти тоа беше причината за непостигнување договор за коалицирање на ДУИ, иако очигледно е дека на ДУИ и одговара така да ја престави работата. Во реалноста всушност освен што на почетокот се констатира дека по ова прашање имаме различни позиции, над 95 проценти од времето за разговори беше посветено на дебата околу барањето на ДУИ за измени на Законот за употреба на јазиците, каде беа и главните разлики, информира ВМРО-ДПМНЕ.

Нагласува дека во разговорите со ДУИ ВМРО-ДПМНЕ биле изрично против воведување двојазичност на целата територија и оти покажале интерес да се води дискусија околу одредени идеи за унапредувања на Законот за употреба на јазиците во оние општини каде живеат етнички заедници различни од македонската во висина од најмалку 20 проценти во рамки на општината, прашање за што исто така имало многу разлики.  Од страна на ВМРО-ДПМНЕ се посочило дека е очигледно оти одредени партии сакаат да ја заобиколат партијата која освои мнозинство гласови на предвремените парламентарни избори и сакаат на тој начин да ги остварат целите поврзани со Законот за употреба на јазиците.

- ВМРО-ДПМНЕ нагласи дека ако за  носење на измени на закон кој го засега малцинството е потребен т.н. Бадентер или мнозинство од немнозинските заедници, тогаш треба да им е јасно дека за измена на таков закон потребна е и подршка од мнозинството на мнозинската зедница, поточно потребно е и мнозинство од Македонците во Парламентот. Како што несакаат помалите етнички заедници да бидат изиграни и надгласани за еден ваков закон од мнозинската заедница-македонската, исто така и мнозинската зедница на Македонци не сака и нема да дозволи да биде надгласана од коалиција составена од малцинството Македонци во Парламентот со сите албански партии и пратеници во истиот.

Амбасадорката запраша дали новите предвремени избори ќе дадаат соодветен резултат за надминување на постојната состојба на што Груевски посочи дека на нив гледа како шанса за држвата, во спротивно алтернативата е континуирано кризирање. Подобро е да ја добиеме можноста и шансата, отколку да кризираме во континуитет беше одговорот на ВМРО-ДПМНЕ. Подобро да се потрошат нови два месеца за нови избори, отколку нови шест месеци, или година заглавени во политичка криза, се вели во соопштението.

Амбасадорката на Турција Еркал Кара истакнала дека се зборува за можноста за коалицирање на СДСМ со другите партии, на што од ВМРО-ДПМНЕ било посочено дека се е можно, но тоа ќе значи трајно напуштање на воспоставениот принцип победникот кај Македонците да коалицира со победникот кај албанските партии и гласачи. Напуштањето на тој принцип би бил иверзибилен процес, процес на кој ќе му нема враќање назад, се нагласува во соопштението.

На средбата се разговарало и за актуелната политичка ситуација во Турција и предизвиците со кои се соочува. Соговорниците изразија надеж за продлабочување на одличната соработка меѓу двете држави на сите нивоа од заеднички интерес, соопшти ВМРО-ДПМНЕ.