Балкан
17. јуни 2021 - 15:18

Стефан Јанев: Политичарите се тие што донесуваат одлуки

Премиерот на Бугарија Стефан Јанев за време на заедничката прес-конференција со неговиот македонски колега Зоран Заев рече дека како соседи и братски народи ни треба постојана комуникација и размена на мислења.

-Во рамките на овие разговори, нема да бидете изненадени што главна точка за која зборувавме е европската перспектива на Република Македонија, рече Јанев.

Тој додаде дека политиката на Бугарија е непроменета многу години наназад.

Како што јави дописникот на МИА, Јанев коментира дека Бугарија цврсто ги поддржува Република Македонија, Албанија и Западен Балкан на патот кон пристапувањето во ЕУ. Но, според него, најпрво треба да се расчистат проблемите за да не ги внесуваме во ЕУ.

-Констатиравме дека во моментот имаме прозорец на можноста да работиме на нерешените прашања што ги имаме досега, особено на спроведувањето на Договорот за соседство, целта ни е да создадеме поволно опкружување на доверба и пријателство, отворен дијалог, додаде Јанев, кој рече дека делегацијата на Заев дошла со конкретни предлози за кои ќе се разговара.

Одговорноста е на политичарите, рече бугарскиот премиер Јанев и истакна дека историската комисија има одговорност пред политичарите кои ја назначиле.

Бугарскиот премиер Стефан Јанев коментира дека постојат политички можности, а првиот услов е потребата од дијалог.

Бугарија, според него, прави сè што е можно за да се најде решение, кога и како тоа ќе се случи зависи од различни фактори кои сите ги знаете, додаде тој.