Струмица воведува дополнителни мерки за заштита од ширењето на корона вирусот
Струмица воведува дополнителни мерки за заштита од ширењето на корона вирусот. По наредба на општинскиот штаб за заштита и спасување јавното претпријатие за комунални дејности Комуналец ги затвора сите отворени пазари во градот. Одлуката стапува на сила од овој викенд, односно од сабота кој во Струмица е пазарен.
Со оваа одлука на неодредено затворени за работа ќе бидат двата пазари на мало Чешел и Кантон, како и кванташкиот пазар. Претходно беше затворен и градскиот пазар кој се наоѓа во склоп на трговскиот центар Глобал.
Во известувањето од општинскиот кризен штаб се апелира до граѓаните за разбирање и почитување на оваа и сите останати мерки кои се преземаат за заштита од ширење на корона вирусот.
Со одлука на општинскиот штаб за заштита и спасување од денеска за рекреативни движења на граѓаните беше затворена и рекреативната трим патека до манастирот „Свети Илија“.
Пред пет дена, како превенција општината ги затвори и сите детски игралишта во парковите. Затворени се и отворените спортски терени, летниковците во парковите, но и пред станбените објекти кои ги користат повозрасните групи граѓани. На сите овие локации има поставено ленти со предупредување дека користењето на истите е забрането.
-
Зоран Ѓеоргиев
Сите содржини од овој новинар