Свет
7. February 2020 - 11:22

СЗО: Невозможно е да се предвиди како ќе се шири новиот коронавирус

Светската здравствена организација (СЗО) соопшти дека е невозможно да се предвиди како ќе се шири новиот коронавирус и кога ќе биде неговиот пик, бидејќи тоа е ново заболување со многу непознати, како што изворот на пренесување, на пример. Ова во електронска порака до „Глобал тајмс“ го соопшти портпаролот на СЗО, Тарик Јасаревич, јави „Радио Кина“.

Тој посочи дека неговото пренесување е зоонетско, односно вирусот бил пренесен на човекот од животни. Неопходни се уште истражувања и анализи на епидемиолошките податоци за да се утврди степенот на пренесување, посочи уште Јасаревич.

Во електронската порака тој, исто така, објаснува дека вработените во СЗО се обидуваат да сфатат како се менува вирусот, ги анализираат информациите од постојните и новите случаи, што е од одлучувачко значење за зголемување на присутноста.

Според последните податоци, во Кина има над 30.000 потврдени случаи на заразени, а бројот на починати е над 600, додека на излекуваните засега е над 1.500.