Свет
10. August 2017 - 18:57

Ветрот и новите горештини повторно ги разгореа шумските пожари во Португалија

Зголемените температури и силните ветрови повторно ги распалија шумските пожари во Португалија, откако привременото заладување во јуни овозможи извесно смирување на бранот пожари, од кои, само во еден од нив загинаа 64 лица, пренесоа американските медиуми. 

Португалската Агенција за цивилна заштита соопшти дека во моментов води борба со седум шумски пожари, во чие гаснење учествуваат над 1.300 пожарникари и 25 авиони и хеликоптери, што фрлаат вода од воздух.

Од сите опожарени шумски површини во ЕУ во текот на оваа година, над една третина се во Португалија.

Според службата за справување со итни ситуации на ЕУ, во Португалија до 5 август целосно изгореле 140.000 хектара шуми, додека во цела ЕУ се изгорени 380.000 хектари.