Во Франција протести и штрајкови во училиштата

На повик на синдикатите денеска во Франција ќе се организираат протестни собири и штрајкови во училиштата, кои сметаат дека ветената помош на Владата во борбата против коронавирусот во училиштата е недоволна, јавуваат локалните медиуми.

Според радиото Франс Инфо, париската префектура не ги одобрила собирите во главниот град, со образложение дека синдикатите не ги пријавиле на време.

Синдикатот ЦГТ одлуката на префектурата ја оцени како неприфатлива, додека друг синдикат повика на протест пред Министерството за образование.

Француските медиуми претходно објавија дека училиштата се соочуваат со проблемот на голем број заразени ученици со коронавирусот, како и заразени просветни работници на кои не им е обезбедена замена. Како резултат на тоа, многу ученици не посетуваат настава.

Според синдикатите, минатата недела штрајкувале 75 отсто од просветните работници во градинките и основните училишта, додека надлежните наведуваат дека во основните училишта штрајкувале 38,5 отсто од наставниците.

Штрајковите доаѓаат на помалку од три месеци пред првиот круг од претседателските избори во Франција, закажан за 10 април. Дел од опозицијата побара смена на министерот за образование Жан Мишел Бланкер и ја критикуваше работата на претседателот Емануел Макрон, кој и покрај тие критики е фаворит во анкетите, иако се уште официјално не се кандидирал.