Израел ги врати телата на 30 Палестинци, Хамас предаде неидентификувани останки на три лица

Израел ги предаде телата на 30 Палестинци на здравствените власти во Газа, јавија светските агенции.

Останките се вратени во замена за телата на двајца израелски заложници кои претходно ги врати палестинската група Хамас. Напредокот, иако мал, дојде и покрај израелските напади во Газа во кои загинаа повеќе од 100 луѓе како одговор на убиството на еден израелски војник.

Телата на 30-те Палестинци се префрлени во Газа преку Црвениот крст. Враќањето на останките го потврди лекар во болницата Наср во јужниот град Кан Јунис. Сепак, нивната идентификација е тешка бидејќи локалните здравствени власти немаат комплети за ДНК анализа.

Досега, Израел ги врати останките на 225 Палестинци, од кои 75 се идентификувани од нивните семејства, соопшти Министерството за здравство на Газа.

Црвениот крст синоќа соопшти дека ги префрлил неидентификуваните останки на три лица во Израел. Сепак, телата сè уште се испитуваат и можеби не им припаѓаат на израелски заложници, изјави израелски воен претставник.

Од почетокот на примирјето, Хамас ги предаде телата на 17 израелски заложници, додека 11 сè уште се во Газа и треба да бидат вратени според договорот.

МИА