Премиера на балетската претстава „Огнени градини“ во МОБ

Балетската претстава „Огнени градини“ на музика од шпанскиот композитор Мануел де Фаља, во кореографија на  Џејмс Амар од Франција, вечер премиерно ќе биде изведена во Македонската опера и балет.

Како што соопшти МОБ, претставата е составена од три дела (Градините на Алхамбра, Кордоба и т.н. Маѓепсана љубов), а кореографијата содржи доста елементи од шпанските традиционални танци, со акцент на фламенгото.

Сценограф е Зоран Костовски, а костимограф Александар Ношпал. Со оркестарот на МОБ ќе диригира гостинот од Шпанија, Јозеп Висент. Гостинка во претставата е и вокалната солистка Хинеса Ортега Кортес, позната по изведбите на фламенгото. Во пијано придружба е Дино Имери. Настапуваат првенците, солистите, балетскиот ансамбл и оркестарот на Македонската опера и балет.

Репризата на претставата е утре кога со оркестарот ќе диригира Бисера Чадловска, а како вокална солистка ќе настапи нашата мецосопранистка, Ирена Кавкалевска.