ОЈО: Пред убиствата вујкото му ја препишал куќата на внукот, имало неразрешени семејни недоразбирања

Дежурен јавен обвинител од Основното јавно обвинителство Прилеп извршил увид на лице место во куќа во центарот на Прилеп каде биле пронајдени безживотните тела на 11-годишно дете и двајца мажи на возраст од 43 и 63 години.

-Според првичните сознанија, 63-годишникот најпрво го лишил од живот својот внук од сестра и неговиот син, поради семејни недоразбирања и нерасчистени имотни прашања. По извршување на делото, мотивите за стореното ги објавил и на една социјална мрежа, а потоа се самоубил, се вели во соопштението од Јавното обвинителство. 

Јавниот обвинител издал наредба за обдукција на починатите, како и за прибирање на сите траги, оружје и муниција пронајдени на лице место кои ќе бидат предмет на вештачење.