Пендаровски: Западниот Балкан е регион од стратешка важност чија иднина е во НАТО и ЕУ
Претседателот на државата Стево Пендаровски во рамки на Самитот на НАТО во Мадрид, учествуваше и се обрати на првата сесија на состанокот на Северноатлантскиот Совет, што се одржува на ниво на шефови на држави и на Влади, а со кој претседава генералниот секретар на НАТО, Јенс Столтенберг.
Со цел успешно справување со асиметричните закани и предизвици, потребно е зајакнување и адаптирање на одбранбените капацитети на НАТО и во таа насока Северна Македонија дава целосна поддршка на новиот Стратегиски концепт на НАТО, документ кој треба да ги даде насоките за идните задачи на Алијансата, истакнал во своето обраќање претседателот Пендаровски, се наведува во соопштението од неговиот Кабинет.
Потребно е, додал тој, да испратиме силна порака за нашето заедништво како сојузници во овие времиња на нестабилност и зајакнување на авторитаризмот.
Шефот на државата Пендаровски ја повторил поддршката за суверенитетот и територијалниот интегритет на Украина во рамки на нејзините меѓународно признати граници и посочил дека Северна Македонија дава целосна поддршка за Сеопфатниот пакет на НАТО за поддршка на Украина.
Во таа насока, тој истакнал дека изразуваме солидарност со нашите сојузници од Источното крило и дека земјава ќе продолжи со активностите во рамки на југоисточното крило на Алијансата. Пендаровски посочил дека Западниот Балкан е регион од стратешка важност, чија иднина е во НАТО и ЕУ, и НАТО треба да продолжи со зајакнување на партнерите преку поддршка на нивните капацитети и отпорност кон малигни актери.
Претседателот истакна дека НАТО останува единствен, суштински и неопходен трансатлантски форум за консултации, координации и акција за сите прашања кои се поврзани со нашата индивидуална и колективна безбедност, посочувајќи дека ни се потребни повеќе ресурси за одржување на амбициите за НАТО 2030, а со цел Алијансата да се адаптира на задачите кои и претстојат во иднина, се наведува во соопштението од кабинетот на Пендаровски.
Ново на Сител
-
Љупчо Палевски Палчо екстрадиран од Турција и сместен директно во Истражниот затвор во Шуто Оризари
-
Тема на денот со Горан Илијевски - Партија на Македонците во Србија
-
Атентат врз словачкиот премиер
-
Флекс кредит и СОС Детско Село заедно за Денот на семејството
-
Предизборниот и постизборниот период продуцира економска криза, сметаат економистите
-
Со нож и се заканија на претседателката на Уставен Кацарска
-
Запален службениот автомобил на директорот на Идризово- оштетена и блиската зграда
-
Уставен го одби барањето на судиите да го врати коефициентот за повисоки плати