Во Битола одбележан Меѓународниот ден на стари лица

Градоначалникот на Битола Наташа Петровска ги посети лицата згрижени во Домот за стари лица во Битола „Сју Рајдер“, и според востановената традиција им го честита Меѓународниот ден на стари лица.

На средбата со старите лица и раководството на установата, градоначалничката Петровска беше информирана за работата на Домот за стари лица „Сју Рајдер“ и условите во кои старите лица го живеат своето секојдневие.

- На старите лица им возвраќаме со грижа каква што заслужуваат. Секоја власт, локална или централна треба да работи во таа насока. Демографската слика во државата, за жал не ни е на завидно ниво и покажува дека населението ни старее. Но, ќе го вложиме својот максимум, за живот на овие простори, како би имале соодветна грижа и старите лица, истакна Петровска.

Дом за стари лица „Сју Рајдер“-Битола во моментов згрижува околу 160 лица на кои им се овозможени грижа на високо ниво, храна, сместување, медицинска заштита и нега.

- Интересот за згрижување на стари лица во Домот „Сју Рајдер“ е голем, но со соодветен начин на менаџирање, листите на чекање, постепено се намалуваат, информираа од установата.