Агаси го напушти кампот на Ѓоковиќ

Американската тениска легенда Андре Агаси веќе не е тренер на српскиот тенисер Новак Ѓоковиќ, јавува американската „ЕСПН“, откако тој работеше како советник и тренер на големите турнир на поранешниот светски број 1.

„Имав само добри намери и се обидов да му помогнам на Новак. Честопати се согласувавме дека не се согласуваме. Му посакувам најдобро во иднината“, изјавил Агаси за „ЕСПН“.

Агаси почна да работи со Ѓоковиќ пред Ролан Гарос минатата година, кога започна драматичниот пад во формата на еднаш доминантниот Србин, „зачинет“ со повредата на лактот поради која пропушти голем дел од сезоната. Претходно, Ѓоковиќ ги отпушти прво Борис Бекер, а потоа и долгогодишниот соработник Маријан Вајда. Сега, Србинот ќе продолжи да работи само со поранешниот чешки тенисер, Радек Штепанек.

Ѓоковиќ имаше неуспешен обид за кам-бек оваа сезона, испаѓајќи во четвртото коло на Австралија опен, додека на Мастерс турнирите во Индијан Велс и Мајами, каде што доминираше во минатото, загуби уште во првото коло.