Александар Јовановиќ Чута: Бараме вонредни избори во Белград во септември

Лидерот на Еколошкото востание и опозициски пратеник во српското Собрание, Александар Јовановиќ Чута, оцени дека е време партиите кои се формални организатори на протестот „Србија против насилството“ да се обединат околу ставот дека „вонредни избори во белград треба да се одржат во септември“ и истакна дека не треба да има паузи во одржувањето на протестот, туку тој да продолжи и во текот на летото, јави дописникот на МИА од Белград.

-Претседателот на Србија Александар Вучиќ вети дека овие избори ќе се организираат до април годинава во разговор со (претседателот на Партијата на слободата и правдата) Драган Ѓилас, изјави за Политика, Јовановиќ, кој е и копретседател на партијата Заедно.

Тој појасни дека е потребно да се излезе со јасни политички позиции, кои, како што наведе, и досега биле активистички.

Според него, „нема потреба од никакви паузи во протестите, но потребно е да се продолжи со притисокот врз власта, а тие што на социјалните мрежи наведуваат дека треба да паузираме до септември, јавно нека се изјаснат“.

-Сè уште не сум слушнал кој од оние што се шетаат по улиците се залага за такво нешто, нагласи Јовановиќ.

Лидерот на ССП, Драган Ѓилас, во неделата изјави дека изборите во Белград може да се организираат веднаш, бидејќи рокот што го поставил Александар Вучиќ одамна е истечен.

-Изборите во Србија може да се организираат веднаш штом владата ќе ги спроведе препораките на мисијата на ОДИХР, Европската комисија и Европскиот парламент, кажа тој и наведе дека со поканата на мисијата на ОДИХР да го контролира изборниот процес во Србија, како и со тврдењето дека Србија го продолжува процесот за пристапување во Европската унија, владата го прифатила спроведувањето на препораките од тие организации.

-Нека го направат тоа што се обврзаа и можеме да одиме на избори. Но, ако режимот на СНС мисли повторно да направи лажни избори и да владее врз основа на такви избори уште четири години, треба да знае дека тоа нема да се случи, рече Ѓилас.