Асфалтирани три улици во општина Зрновци

Општина Зрновци продолжува со реализирањето на зацртаните проекти во делот на комуналната инфраструктура. Според програмата денеска се асфалтирани и преостанатите три улици во населеното место Зрновци.

-Се определивме да ги асфалтираме улиците „Аспарух Манев“, „Филе Ристов“ и „Генерал Апостолски“ во должина од 1.300 метри. Вкупната инвестиција изнесува 1 милион денари, средства што ги обезбедивме од Буџетот на општината за оваа година, истакна градоначалникот на општина Зрновци Блаже Станков. 

Во изминатите месеци од оваа календарска година, според Станков, регулирано е коритото на Морошка река, изградени се два моста на Видовишка река, поврзани се населените места Мородвис и Видовиште со нова асфалтна сообраќајница со магистралниот пат М-5 во должина од 1.500 метри, а општинската зграда доби нова термо фасада. До крајот на годината, најави Станков, ќе започнат градежните работи на новата детска градинка и на мостот на Зрновска река кој настрада во поплавите на почетокот од годинава.