Аврамопулос: Бугарија има важна улога во справувањето со мигрантската криза

Бугарија има многу важна улога во справувањето со мигрантската криза, изјави еврокомесарот за миграција и внатрешни работи, Димитрис Аврамопулос, по средбата во зградата на Обединетите нации со бугарскиот заменик-премиер Румена Бачварова и министерот за надворешни работи Даниел Митов, јави БТА.

На средбата било дискутирани за соработката меѓу бугарската Влада и Европската комисија во однос на мигрантската криза. 

- Ситуацијата е мошне тешка, трговците со луѓе ги пренасочуваат мигрантските текови низ Бугарија и ЕУ. Но Бугарија не е сама, изјави Аврамопулос.

Тој посочи дека за земјата се отпуштени 160 милиони евра и оти на 6 октомври ќе биде означен почетокот на новиот европски проект - Европска служба за гранична контрола и крајбрежна стража. 

- Целта е да можеме подобро да управуваме и да ги штитиме заедничките европски граници, рече еврокомесарот.

Тој додаде дека Бугарија ќе има исклучително важна улога - на прво место ќе треба да ги заштитува своите граници, но во исто време и европските.

- Бугарија ќе биде дел од европската сеопфатна миграциска политика, нагласи еврокомесарот.

Аврамопулос ја поздрави бугарската Влада за вложените напори за справување со тешката ситуација во однос на мигрантската криза.

- Ставот на Бугарија, кој го претставивме пред Генералното собрание на ОН беше слушнат. Ние сметаме дека државите треба да соработуваат, да бараат заеднички решенија, кои се синтеза од хуманитарните и организациските аспекти на тој процес, при што треба да се почитуваат правата на мигрантите, рече Бачварова по средбата со Аврамопулос.