Бејли: Реформите во медиумите на маса и пред и по изборите

Реформите во медиумите се дел од договорот од Пржино и дел од ургентните европски реформи за Македонија, рече денеска амбасадорот на САД Џес Бејли потсетувајќи на заедничката изјава од синоќа на САД и ЕУ по постигнатиот резултат, како што наведе, по интензивните дискусии во изминатите неколку дена.  

- Тоа е на маса пред изборите и после изборите, тоа не е нешто што ќе се случи преку ноќ. Во таа насока многу е важно во врска со изборите како вие како репортери и новинарски организации ќе ги покривате изборите. Вие самите се обврзавте на кодекс за етичко известување за време на изборите и следењето на тој кодекс за етичко известување навистина  ќе направи разлика во однос на тоа граѓаните на Македонија да ги слушнат сите мислења и да бидат целосно информирани и да го направат изборот за време на изборите, изјави Бејли, кој денеска заедно со  министерот за одбрана Зоран Јолевски ја отворија изложбата „Американскиот Црвен крст во Македонија за време на Првата светска војна“.