Бобан Илиоски испиша историја – прв Македонец со договор во GLORY

Македонскиот кикбоксер Бобан Илиоски објави дека потпишал договор со GLORY Kickboxing, една од најпознатите светски организации во овој спорт.

Илиоски веста ја сподели на социјалните мрежи, нагласувајќи дека со овој чекор му се остварува долгогодишниот сон, но и дека се отвора нова страница за македонскиот кикбокс.

„Денес со огромна гордост можам да кажам дека го направив еден од најголемите чекори во мојата кариера – потпишав договор со GLORY Kickboxing“, напиша Илиоски.

Тој вели дека зад успехот стојат години напорни тренинзи, жртви, падови и повторни станувања, а посебно им се заблагодари на семејството, тренерите, пријателите и сите кои го поддржувале во текот на кариерата.

Илиоски во својата објава истакна дека е првиот кикбоксер од Македонија кој потпишал договор со GLORY.

„Ова е само почеток. Македонијо, време е да се слушне нашето име на најголемата кикбокс сцена во светот. Сонот е остварен, историјата е започната“, порача тој.

Посебна благодарност Илиоски упати и до познатиот тренер Мајк Пасениер за укажаната доверба и можноста да стане дел од организацијата.