Британски научници тврдат дека Аспиринот го спречува ширењето на ракот

Британски научници открија зошто аспиринот, широко распространет лек против болки и треска, може да го спречи ширењето на ракот, откритие што носи нова надеж за идните третмани на оваа болест.

Истражувачки тим открил дека аспиринот им помага на клетките на имунолошкиот систем да ги уништат метастазираните клетки на ракот, кои се одговорни за 90 отсто од смртните случаи поврзани со рак. Ова откритие може да го направи аспиринот дел од стандардната терапија за рак во иднина.

Досега, научниците претпоставуваа дека антиинфламаторните својства на аспиринот се клучни за неговото дејство против ракот, но точниот биолошки механизам остана непознат, што ги спречуваше лекарите да го користат како стандарден третман.

Во новото истражување, научниците им давале мали дози аспирин на глувци со различни видови рак, вклучително рак на дојка, дебело црево и кожа. Резултатите покажале дека кај третираните глувци имало значително помалку метастази во споредба со нетретираните. Нивото на тромбоксан А2 во крвта, соединение за кое се верува дека игра клучна улога, исто така било намалено.

Истражувачите откриле дека тромбоксан А2 им помага на клетките на ракот да се „кријат“ од Т-лимфоцитите, имунолошки клетки што ги напаѓаат туморите. Аспиринот, со намалување на нивото на тромбоксан, ја укинува оваа заштита, овозможувајќи им на Т-клетките да ги пронајдат и уништат клетките на ракот пред да се прошират.

Научниците планираат да го повторат експериментот на луѓе. Доколку аспиринот покаже сличен ефект, тоа може да го трансформира пристапот кон лекувањето на ракот и да помогне во утврдувањето кои видови рак би можеле најдобро да реагираат на овој евтин третман.

МИА