Червар се подалеку од Металург

Тренерот на македонскиот ракометен вицепрвак Металург, Лино Червар се наоѓа во Загреб и таму ќе биде и во следниот период. Тоа значи дека во целост ќе ја извршува и својата функција како селектор на хрватската репрезентација.

Како што пишува хрватскиот медиум „Вечерњи лист“ Червар во Металург најверојатно ќе биде само како советник и дека неговиот помошник Александар Јовиќ ќе ја преземе првата екипа на Металург.

Червар на прашање за неговиот статус одговорил:

- Отворен сум за сите прашања за репрезентацијата. Металург оставете го сега на мир. Останувам во Загреб, имаме многу работа, а малку време.

Червар ќе ја предводи хрватската репрезентација на Европското првенство во кое таа ја има улогата на домаќин. Во октомври за време на „неделата на ЕХФ“ ќе има пауза во клупските натпреварувања, а тоа значи дека репрезентациите ќе имаат собири.