Четири угостителски објекти во Центар ќе бидат казнети за гласна музика

Во кафе-барот „Чао“, пабот „Комедија“, „Аперитиво бар“ и „Џуси бар“ во општина Центар констатирано е дека бучавата која доаѓа од нив ја надминува максимално дозволената. Казните за одговорните и за правните лица ќе бидат изречени според позитивните законски прописи.

По налог на општина Центар, овластена фирма извршила мерење на бучавата на 25 и 26 ноември годинава во овие четири угостителски објекти. 

Инспекциските служби, како што информира општина Центар, извршија надзор по пријава од граѓани дека музиката која доаѓа од кафулињата им го нарушува мирот и сонот.

Општина Центар најавува дека ќе продолжи со преземање мерки против гласната музика во објектите и ги повикува сите жители да пријават гласна музика за да можат инспекциските служби брзо да реагираат и да преземат соодветни мерки.