Делегација на Град Скопје положи цвеќе на гробот на претседателот Трајковски

Делегација на Град Скопје денеска во Алејата на великаните на градските гробишта Бутел положи цвеќе на гробот на поранешниот претседател на Република Македонија, Борис Трајковски, по повод одбележувањето на 14 години од неговата смрт.

Со овој чин, делегацијата составена од претседателката на Советот Љубица Јанчева, советникот на градоначалникот Азиз Максутовиќ и членот во Советот Петар Шапе, оддаде почит на вториот претседател на независна Република Македонија, кој на 26 февруари, 2004 година, во атарот на село Ротимље, во близина на Мостар, трагично го загуби својот живот, во авионска несреќа. 

Цвеќе, на гробот на Трајковски, положија и делегации од Владата, од Кабинетот на претседателот на Република Македонија, од Собранието, од Министерството за култура, од АРМ, претставници на политички партии, претставници од дипломатскиот кор, претставници на образовни и научни институции, здруженија, како и голем број граѓани од нашава земја и од странство.