Денеска се одбележува Денот на ОН

Датумот на стапување во сила на основачката Повелба на Обединетите нации, 24 октомври 1945 година, се означува и слави како Ден на ОН.

Повелбата е потпишана на 26 јуни 1945 година, за да стапи во сила на 24 октомври истата година, а тој датум е прифатен како Ден на ОН.

Прво, беше потребно таа да биде ратификувана од постојаните членки на Советот за безбедност, односно Велика Британија, Франција, Кина, САДоединетите Американски Држави и Советскиот Сојуз.

Обединетите нации го слават својот ден на 24 октомври, потсетувајќи на воспоставувањето на меѓународниот систем кој требаше да придонесе за зачувување на мирот и спречување на нови глобални конфликти по Втората светска војна.

Повеќе од осум децении подоцна, ОН останува најширокиот форум за меѓународна соработка, но нејзината работа се одвива во околности каде што државите често имаат спротивставени политички и безбедносни интереси.

Организацијата не е светска влада и нема неограничени овластувања. Нејзината способност да влијае на настаните зависи од меѓународното право, одлуките на надлежните тела и подготвеноста на земјите-членки да соработуваат.

Обединетите нации имаат важна улога во решавањето на хуманитарните кризи, обезбедувањето помош на бегалците, заштитата на децата, подобрувањето на јавното здравје и следењето на човековите права.

Нивните агенции и програми работат во различни области. УНИЦЕФ работи на заштита на децата и нивните права, Светската здравствена организација ги координира меѓународните активности во областа на здравството, додека Високиот комесар на ОН за бегалци обезбедува поддршка на луѓето кои морале да ги напуштат своите домови.

ОН, исто така, учествува во дипломатска медијација и мировни операции.

Во зависност од мандатот и условите на теренот, овие активности можат да помогнат во следењето на прекинот на огнот, заштитата на цивилите и создавањето услови за политички преговори.

Сепак, хуманитарната помош и дипломатските напори не значат дека организацијата може во секој случај да ја запре војната или да спречи сите кршења на меѓународното право.

Најважните одлуки за меѓународниот мир и безбедност ги донесува Советот за безбедност на ОН.

Неговите пет постојани членки се САД, Русија, Кина, Франција и Обединетото Кралство, од кои секоја има право на вето врз суштинските одлуки.

Генералното собрание на ОН, во кое учествуваат сите земји-членки, овозможува дискусија за глобалните проблеми и усвојување резолуции.

Овие резолуции генерално не се правно обврзувачки, но можат да го покажат степенот на меѓународна поддршка за одредена позиција.

МИА