ДИК: Во 43 општини завршија локалните избори

Државна изборна комисија вчера попладне ги објави и официјалните резултати од локалните избори добиени врз основа на оригиналните записници и прогласи крај на изборниот процес во 43 општини по првиот круг. Тоа значи дека во овие општини, градоначалникот е избран по првиот круг и таму веќе нема да има гласање. Во 33 општини на 2 ноември повторно ќе се гласа во рамки на вториот изборен круг, но овој пат, за најголемиот дел од Македонија ќе има само 1 гласачка кутија, додека за граѓаните на Скопје кои живеат во Аеродром, Центар, Карпош или Шуто Оризари ќе стојат две гласачки кутии бидејќи ќе има втор круг и на изборите за градоначалник на Скопје. 

Гласањето ќе се повтори во 4 општини. Во Гостивар, Маврово Ростуше, Врапчиште и Центар Жупа во првиот круг излегоа помалку од една третина од гласачите па таму целиот процес ќе се повторува.

Според официјалните резултати излезноста на ниво на цела Македонија е 48,3% што е најниска излезност на едни локални избори. 

По првиот круг, ВМРО-ДПМНЕ освои 33 градоначалници, 5 коалицијата Вреди. Коалицијата на ДУИ доби 3 општини, исто колку и СДСМ.

Во вториот круг во Скопје во трката влегуваат Орце Ѓорѓиевски кој освои над 90.000 гласа и Амар Мециновиќ од Левица кој имаше околу 30.000.