Димовски: Ќе предложам Јанева да не добие апанажа од Собранието

Барањето за апанажа на поранешната специјална јавна обвинителка Катица Јанева, која е обвинета во случајот „Рекет“, денеска ќе се најде на дневен ред на една од седниците на Комисијата за прашања на изборите и именувањата.

Претседателот на Комисијата Илија Димовски изјави дека тој ќе побара на Јанева да не и се додели апанажа бидејќи не е избрано лице.

– Денеска ќе го предложам и тоа на дневен ред. Ќе предложам врз база на законските одредби Комисијата да не додели апанажа на Јанева од формалните причини, а тоа се дека таа не е избрана како државен функционер од страна на Собранието, што е услов по закон, туку е само предложена од Собранието, а нејзиниот избор го изврши Советот на јавни обвинители, рече Димовски.

Пратеникот на ВМРО-ДПМНЕ дополнително посочи, на како што рече, скандалите поврзани со неа, како и на злоупотребата на институцијата СЈО и од финансиски и од политички аспект.

– Тоа не ни дава воопшто право да размислуваме на таков чекор. Единствено што може да направиме како Собрание, како пратеници е да апелираме до Јанева, да исполни само едно нејзино граѓанско право, а и обврска, а тоа е да почне да зборува јавно кој, како, кога, зошто учествувал во креирање на тоа чудовиште од институција низ кое се вршеле политички уцени и се вршел финансиски рекет од голем број бизнисмени, рече Димовски.

Само на тој начин, вели тој, таа ќе покаже дека се покајала и дека била несвесна или злоупотребена. е