До крајот на јануари шпанскиот Парламент ќе го ратификува Протоколот за НАТО

Премиерот Зоран Заев денеска изјави дека од неговиот шпански колега Педро Санчез добил уверување оти Парламентот на Шпанија до крајот на јануари ќе го ратификува Протоколот за членство на земјава во НАТО.

Заев нагласи дека Санчез го информирал оти на почетокот на јануари ќе формира Влада, по што неговиот владин Кабинет до Парламентот ќе го достави предлогот за ратификација на Протоколот и тој ќе го ратификува документот до крајот на месецот.

– Нема ништо спорно, нема никаков дел кој е суштествен. Се работи само за технички аспект на ратификацијата, изјави Заев на дебатата „Патот до членството во НАТО: Од изолирана до интегрирана земја“ на Филозофскиот факултет во Скопје.