Дождовите предизвикаа зголемен водостој на реките и го отежнаа сообраќајот

Врнежите од дожд кои во изминатите денови ја зафатија Македонија предизвикаа зголемување на водостојот на реките и го отежнаа сообраќајот на неколку патни правци.

Од УХРМ соопштија дека исклучиво висок водостој утринава е измерен на реката Треска, односно на хидролошката станица во Македонски Брод каде нивото на реката е повисоко за 50 сантиметри во однос на вчерашниот ден. Зголемен водостој за 50 сантиметри има и кај реката Пчиња, како и кај реката Боротинска каде денеска нивото е зголемено за повеќе од 200 сантиметри. Исто така висок е водостојот и на реката Радика, Сатеска, Голема, Црна Река и Крива Река, како и на реката Вардар во горниот тек и во Скопје.  

Во текот на денешниот ден повторно се очекуваат врнежи од дожд, така што, како што посочуваат од УХРМ, водостоите на реките и понатаму ќе останат високи.

Можни се локални излевања во горниот дел од сливот на Вардар, односно во Полошкиот регион, во сливот на Треска, околу месноста Пласница, како и на одделни места во сливот на реките Радика, Црн Дрим, Сатеска и Црна Река, кај Боротинско Поле.

Поради обилните врнежи од дожд и одрони на патот има прекини и отежнувања на сообраќајот на неколку патни правци низ државата.

Целосен прекин на сообраќајот од еден часот по полноќ има на регионалниот пат Валандово - село Удово кај месноста викана Калковска река поради надојдена вода, а непрооден е и локалниот пат село Железнец – село Мало Илино во Демир Хисар.

Отежнато се одвива сообраќајот на патниот правец Делчево – Македонска Каменица поради обилните врнежи од дожд и честите одрони на патот, а на патот Виница – Берово кај месноста викана Рибарник, поради одрон, сообраќајот се одвива по една коловозна лента во должина од 10 метри. 

Сообраќајот се одвива отежнато и на патот Маврово – Галичник, 100 метри пред Царева Чешма, поради излевање на вода на коловозот, а поплавување, според информација од РУЦК во општина Сарај, има и на подвозникот кај клучката Матка.