Дуња Иванова со највисок светски ранг во македонскиот велосипедизам

Македонската репрезентативка во планински велосипедизам Дуња Иванова, членка на велосипедскиот клуб „Енерџи“ и актуелна државна шампионка, се искачи на 33. место на најновата светска ранг-листа на Меѓународната велосипедска унија (УЦИ), поставувајќи нов највисок пласман за македонското велосипедизам.

До овој значаен резултат Иванова стигна по серијата успешни настапи на три трки од престижната HERO World Cup серија – Коста Бланка во Шпанија, Елба во Италија и Натурланд во Андора. Дополнителни бодови освои и на трката во Кастро, Италија, како и со одбраната на шампионската титула на државното првенство во МТБ маратон.

Со настапот во Андора Иванова обезбеди квалификација за претстојното Светско првенство во планински велосипедизам, кое ќе се одржи во Италија.

Следниот предизвик за македонската велосипедистка е Европското првенство во Рамалес де ла Викторија, Шпанија, каде како репрезентативка ќе се натпреварува на исклучително техничка патека долга 75 километри со вкупно висинско искачување од 3.000 метри.

МИА