Екстерните испити од државната матура ќе се полагаат од 4-ти до 15 јуни

Министерството за образование и наука и Државниот испитен центар попладнево ги соопштија датумите за екстерните испити од полагањето државна матура во јунскиот рок за учебната 2015/2016 година.

Мајчин јазик и литература матурантите ќе полагаат на 4 јуни, математика на 9 јуни, странски јазик на 13 јуни, а испитите по физика, хемија, биологија, бизнис, историја, филозофија и естетика ќе бидат на 15 јуни 2016. Полагањето на сите испити ќе почнува во 10 часот.

МОН информира дека динамиката на реализирањето на екстерните испити во јунскиот ипитен рок е согласно со Концепцијата за државна матура и завршен испит. 

Прелиминарните резултати од екстерните испити на кандидатите ќе им бидат достапни најдоцна 30 дена од спроведувањето на последниот екстерен испит.