ЕУ вети дека ќе спречи масовна „илегална миграција“ од Авганистан

Европската унија соопшти дека ќе се обиде да го запре евентуалниот масовен прилив на мигранти од Авганистан преку обезбедување помош за земјите од регионот и зајакнување на границите, јави ДПА.

„Врз основа на научените лекции, ЕУ е решена да работи со заеднички сили за да спречи повторување на неконтролираните и големи илегални мигрантски текови со кои се среќаваше претходно“, се вели во конечната Изјава од синоќешниот состанокот на министрите за внатрешни работи и правда од ЕУ.

Заедничката Изјава не содржи конкретни ветувања дека ЕУ масовно ќе прифаќа луѓе кои бегаат од талибанскиот режим во Авганистан. Наместо тоа, Унијата вели дека ќе им помогне на соседите на Авганистан „да го зајакнат својот капацитет да обезбедат заштита, пристојни и безбедни услови за прием“ за бегалците. На крајот од документот се нагласува дека „поддршката може да се обезбеди во форма на доброволно преселување, при што приоритет им се дава на ранливите лица како што се жените и децата“.

Еврокомесарката за внатрешни работи Илва Јохансон истакна дека „најдобриот начин да се спречи миграциската криза е да се спречи хуманитарна криза“.

ЕУ работи на спречување на повторување на настаните од 2015 година, кога повеќе од милион луѓе кои избегаа од граѓанската војна во Сирија пристигнаа во Европа. Ова предизвика внатрешни несогласувања во ЕУ околу начинот на распределба на мигрантите меѓу земјите-членки.