Фејсбук отвора илјада работни места во Европа

Фејсбук соопшти дека оваа година планира да отвори илјада нови работни места во Велика Британија, меѓу кои ќе има и работници ангажирани на развој на алатки за отстранување на штетни интернет содржини.

Новите работни места ќе бидат отворени пред планираното отворање на нова канцеларија во Лондон во 2021 година, а со нив вкупниот број на Фејсбукови работници на островот ќе се зголеми на 4.000.

Британскиот главен град е најголем инженерски центар на Фејсбук надвор од САД.

Според извештаите, повеќе од половина нови работни места ќе бидат фокусирани на технологијата, вклучувајќи програмски инженеринг, дизајн производи и наука за податоци. Новите работници, исто така, ќе се занимаваат со развој на апликациите Вацап и Воркплејс.

Дел од новите работници би можел да биде ангажиран во тимот на Фејсбук „Комјунити интегрити“, кој произведува алатки за откривање и отстранување штетни содржини на платформите како што се Месинџер, Инстаграм и Вацап.