Фудбал У-18: Црна Гора и се реваншира на Македонија

 Пораз на македонската фудбалска репрезентација до 18 години на вториот контролен натпревар против соодветната селекција на Црна Гора одигран денеска во Скопје.

 

Избраниците на Вујадин Станојковиќ во ефикасна фудбалска претстава се поразени со 3:4 со што гостите се реваншираа за минималниот пораз од пред два дена од 1:0.

 

Црна Гора максимално ги користеше грешките на нашата одбрана. И кога се чинеше дека по предноста од 4:0 лесно ќе стигне до победата, малку недостасуваше „црвено-жолтите“ да направат целосен резултатски пресврт. Првиот гол за Македонија го постигна Енис Фазлагиќ од пенал во 61. минута . Потоа следуваше погодок Диме Митровски во 63. Минута и гол на Кирил Ристовски со глава во 72. минута.

 

Во финишот на средбата Митровски се најде сам пред противничкиот голман, но големата шанса за изедначување остана без реализација.

 

Головите за Црна Гора ги постигнаа: Илија Вукотиќ Илија од пенал (1. минута), Павле Крстовиќ (49. и 59. минута) и Алекса Мирушиќ (58. минута).