Германска министерка предупредува на глобален пад на правата на жените

Германската министерка за развој Свења Шулце денеска предупреди дека жените и девојките ширум светот се соочуваат со сè поголеми предизвици, наместо да го гледаат Меѓународниот ден на жената како причина за славење.

– Жените и девојчињата немаат причина денеска да слават, наместо тоа мора да се борат.

Затоа што нападите врз правата на жените се зголемија ширум светот, исто како и мизогинистичката пропаганда и политика, рече Шулце во Берлин.

Таа ги истакна опасностите од намаленото меѓународно финансирање за програмите за зајакнување на жените, нарекувајќи го голема закана за глобалниот развој, јави ДПА.

– Кога на девојчињата им е забрането образованието, страдаат цели општества. Кога немаат пристап до контрацепција, стапките на несакана бременост и смртност на мајките се зголемуваат, истакна Шулце.

Таа додаде дека присилните детски бракови им ја одземаат иднината и достоинството на младите девојки.

Според Шулце, падот на финансирањето на програмите и институциите за поддршка на жените делумно се должи на одлуките донесени од новата администрација на американскиот претседател Доналд Трамп.

Американската влада јасно стави до знаење дека има за цел да го намали финансирањето за зајакнување на жените, образованието и здравствените услуги како политика, рече таа.