Германските покраини им одземаат пари и вредни предмети од бегалците

Дел од германските јужни покраини конфискуваат пари и вредни предмети од бегалците при нивното влегување во земјата, признаа локалните власти во покраината Баварија.

- Практиката во Баварија и федералните правила содржани во законите се слични на ситуацијата во Швајцарија изјави денеска баварскиот министер за внатрешни работи Јоаким Херман за весникот „Билд“.

Според германските закони, како што јави дописникот на МИА од Берлин, парите и вредните предмети можат да бидат одземени од властите доколку тие ја надминуваат вредноста од 750 евра и доколку барателот на азил има или се очекува да има сметка со поголема сума пари.

Во покраината Баден Виртенберг правилата се уште построги, бидејќи полицијата таму може да конфискува стоки во вредности од над 350 евра.

Просечната вредноста на одземените пари и предмети од бегалците просечно е со четирицифрени суми, пренесуваат германските медиуми.

Целта на овој закон кој дозволува конфискација, е да се искористат нивните средства пред да добијат помош од државата.