Хан во понеделник во Србија

Еврокомесарот за европска соседска политика и преговори за проширување, Јоханес Хан в понеделник ќе ја посети Србија, каде во главниот град Белград е предвидено да се сретне со државниот врв на оваа балканска држава. Како што јавува дописникот на МИА од Брисек, на 5 декември, Хан ќе се сретне со српскиот премиер Александар Вучиќ, со министерот за надворешни работи, Ивица Дачиќ, како и со студенти и претставници на академската заедница.

Во пресрет на неговата посета на Србија, еврокомесарот Хан изјави дека „Србија припаѓа на европското семејство и прави извонреден напредок кон својата стратешка цел за членство во ЕУ“.

- ЕУ е врвен партнер на Србија во трговијата, инвестициите и во обезбедувањето на финансиска поддршка во сите сектори. Унијата обезбедува корист на српските граѓани во образованието, бизнисот, владеењето на правото, јавната администрација, патишта, мостови, заштита од поплави итн. Јас работам тесно со Србија и можам да кажам дека заедно сме посилни, како партнери и пријатели во решавањето на миграцијата, невработеноста, безбедносните предизвици и зачувување на мирот и стабилноста во регионот - изјави Јоханес Хан.