Харадинај бара од Тачи да ги закаже предвремените парламентарни избори

Поранешниот косовски премиер Рамуш Харадинај истакна денеска дека побарал од Уставниот суд толкување на неговата оставка, која ја поднесе на 19 јули, како и за идното функционирање на Владата до одржување на предвремените парламентарни избори.

Тој на својот Фејсбук профил напиша дека целта на неговото барање до Судот е да добие објаснување за правната ситуација, создадена во нови околности.

Харадинај смета дека тоа е негова одговорност, со цел до следните избори Владата да функционира согласно уставната и правната рамка.

Истовремено, тој го повика косовскиот претседател Хашим Тачи, Парламентот и политичките партии да ги преземат сите активности, кои се потребни за одржување вонредни парламентарни избори.

Предвремените парламентарни избори во Косово би можеле да се одржат на 8 септември, објави претходно локална телевизија.

Харадинај поднесе неотповиклива оставка, бидејќи беше повикан да се појави во Хаг пред Специјалниот суд за воени злосторства во периодот 1998/2000 година на поранешна ОВК.