Иран добива пристап до замрзнати активи во вредност од 32,6 милијарди долари

Со укинување на санкциите Иран добива пристап до своите активи во вредност од 32,6 милијарди долари, замрзнати во странски банки, соопшти шефот на иранската централна банка Валиука Сеиф, пренесува ТАСС.

Претходно централниот банкар на Иран замрзнатите активи на земјата ги оцени на околу 30 милијарди долари.

- Од нив, 28,1 милијарда долари припаѓаат на иранската централна банка, а 4,5 милијарди на други државни организации, истакна Сеиф.

Според шефот на централната банка на Иран системот за меѓународни меѓубанкарски трансакции СВИФТ ќе биде достапен на иранската централна банка и останатите ирански банки по 7 до 10 дена.

Откако Меѓународната агенција за атомска енергија (МААЕ) синоќа објави дека Иран ги исполнил условите за стапување во сила на историскиот нуклеарен договор меѓу Техеран и светските сили, ЕУ објави целосно, а САД делумно укинување на санкциите.