Италијанската железница го купува Траиносе

Италијанската железница „Феровие Дело Стато Италиане“ С.п.А во целост ќе ја преземе грчката железница Траиносе за 45 милиони евра, соопшти грчкиот Фонд за развој.

Понудата на италијанската железница денеска официјално беше отворена и грчката агенција за приватизација ја прифати во согласност со совети што ги доби од консултанти за продажба.

Досието од тендерот ќе биде испратено до Судот за ревизија за преддоговорна инспекција и договорот за продажба ќе биде потпишан откако судот ќе го одобри. Завршувањето на трансакцијата ќе зависи од одобрувањето на надлежните органи.

„Феровие“ е трета по големина железничка компанија во Европа и се очекува да пренесе умешност, практично знаење и искуство за Траиносе.

Фондот за развој соопшти дека завршувањето на тендерот претставува заокружување на процес кој започна пред три години и обезбедува одржливост и понатамошен развој на Траиносе.