Избрани 10 претставници кои ќе ја претставуваат Бугарија во Европското обвинителство

Повеќе од 12 часа траеше изборот на 10 бугарски претставници во Европското обвинителство, со кој раководи романската обвинителка Лаура Ковеши. Првично, Бугарија требаше да има двајца претставници во европската институција, но по разговорот меѓу генералниот обвинител Иван Гешев и Ковеши, Бугарија беше во можност да испрати уште осум претставници, јави дописникот на МИА од Софија.

Весникот „24 часа“ објави дека помеѓу избраните ќе биде и обвинител кој работел на случајот со обвинетиот бизнисмен Васил Божков, кој се крие во Дубаи.

Тројца од избраните за претставници во Европското обвинителство не беа поддржани од главниот обвинител Иван Гешев.

Тој пред гласањето истакна дека повеќето од 35 пријавени кандидати имаат беспрекорна професионална биографија. Гешев истакна дека десетмината избрани од Обвинителскиот колеџ ќе бидат предложени до Европското обвинителство, кое ќе одлучи дали ќе ги одобри.