Изгоре куќа во Речица, Кумановско

Момчило Стефановски, 55-годишен самохран родител од кумановското село Речица, невработен, татко на лице со попреченост, денеска преку медиумите, побара помош од  граѓаните и институциите за сместување, откако во пожар што избувна вчера попладне изгоре објектот кој му го отстапиле за живеење „Македонски железници“.

 

Стефановски 16 години живеел во поранешната железничка постројка „Карпош“ над село Речица. Пожарот избувнал  околу 14 часот, а како што информираше командирот на ТППЕ Куманово, Дејан Илиевски го гаселе екипи на противпожарната единица се  до четири часот утрово.

 

- Секоја година се бориме во ова време со палења стрништа, овој пат не успеавме, се што имав се изгубив. Се мачев и јас и екипите на противпожарната единица, помагаа и од Македонски железници, но попусто, се отиде во неповрат, изјави Стефановски.

 

 

- Донесовме пакети со храна, вода, хигиенски прибори, церада. Ќе продолжиме со пружање помош и во иднина, рече Бојан Петровски, лекар од мобилниот тим на Црвен крст Липково.

 

Стефановски апелираше до граѓаните и институциите да му помогнат, нагласувајќи дека во моментов најпотребно му е сместување за него и синот, лице со попреченост.

 

Во пожарот изгореле и мини-столарска работилница во која Стефановски самостојно работел, живина, како и домашни миленичиња.