Крива Паланка го одбележа патрон празникот Св.Јоаким Осоговски

Со чествувања во храмот посветен на Св.Јоаким Осоговски, манастирот кој го носи името на светецот и концерт на хрватската музичка ѕвезда Петар Грашо, во општина Крива Паланка беше одбележан денот на светителот-закрилник на градот.

Ден пред празникот од храмот Св.Великомаченик Димитриј во градот се одржа литија на Св.Јоаким Осоговски, која водеше од градската црква до параклисот пред општината, додека вчера во манастирот се служеа утрена богослужба и света архиерејска литургија, а во дворот на манастирот пред неколкуилјади верници беше осветена вода и се кревааа славски колачи.

Празничната атмосфера во градот се огледаше во секој сегмент, туристи и верници дојдоа од сите краеви на државата, но и од соседните Србија и Бугарија, но и нашинци, кривопаланчани – иселеници, за овој празник дојдоа во родниот град и со семејствата го славеа денот на светителот, познат во околијата и надалеку по својата светост, а манастирот со раскошната убавина, со која ги мами посетителите.

Вечерта, на градскиот плоштад во центарот на градот, пак, општината во рамки на празнувањата концерт имаше хрватскиот пејач Петар Грашо, а како предгрупа настапи „Камелеон“ од Охрид.

Празнувањата во Крива Паланка почнаа со културно-уметничка програма од 24-ти месецов и ќе се заокружат утре со „Џојфест“ на кој ќе настапи Влатко Стефановски.