Кривична пријава за раководителот на Подрачната единица за земјоделство во Битола

Дополнителниот заменик - министер за земјоделство, шумарство и водостопанство Љупчо Николовски денеска до Јавното обвинителство за гонење на организиран криминал и корупција поднесе кривична пријава против сегашниот раководител на Подрачната единица на Министерството во Битола, Илија Србиновски.

Кривичната пријава е поднесена поради основано сомнение дека Србиновски сторил кривично дело „злоупотреба на службената положба и овластувања“.

Николовски денеска изјави дека кривичната пријава ја поднел заедно со сите докази што ги презентирал на прес-конференција, а кои се однесуваа на доделувањето на државно земјоделско земјиште на фирми блиски на Србиновски.

- Секој кој се огрешил пред законот мора да одговара, изјави Николовски.