М-НАВ и ИКАО ја унапредуваат соработката за добивање компетентни воздухопловно-технички професионалци

Унапредување на соработката во формирање на компетентни и квалификувани воздухопловно-технички професионалци, како услов за ефикасно функционирање на системот за управување со воздушниот сообраќај била тема на средбата на Климент Чепуњоски, член на УО на Македонската навигација (М-НАВ АД Скопје) и Извршен директор на воздухопловна техника со  претседателот на Советот на Меѓународната оганизација за цивилно воздухопловство-ИКАО, Олимујива Алиу.   

Како што информираа од М-НАВ, на средбата која се одржала вчера во седиштето на ИКАО во Монтреал, Чепујноски констатирал дека се неопходни континуирани тренинзи и освежувања на знаењата на воздухопловно-техничкиот персонал во услови на постојано усовршување и се поголема употреба на уреди и системи кои обезбедуваат сигурен воздушен сообраќај.

- Потребно е да се изгради функционален систем што ќе овозможи покревање и усовршување на знаењето, како и проверка на компетентноста на воздухопловно - техничкиот персонал, согласно регулативите на ИКАО. Како член на УО на Македонска навигација (М-НАВ АД), со Алиу разговарав за условите што треба да ги исполни М-НАВ во делот на стандарди и практики на тренинг, со цел лиценците на  нашите воздухопловни техничари да бидат меѓународно признати, изјави Чепуњоски.

Според него, воздухопловно - техничкиот персонал, меѓународно познат како ATSEP, треба да обезбеди опремата и системите да се во исправна и стабилна состојба за да се гарантира точноста на информациите од овие системи, кои пилотите ги користат директно, но и индиректно преку услугата која ја дава секторот за воздухопловна навигација во М-НАВ, во чиј состав се контролорите на летање, колегите од ФИО, АИС, МЕТЕО, ЦОЛ и други.

На средбата од ИКАО била ветена поддршка на М-НАВ во градењето капацитети за следната генерација воздухопловно-технички професионалци, во рамките на „No Country Left Behind initiative“, стои во соопштението.