Loading Video...
Фудбал
14. November 2021 - 20:52
Македонија го совлада Исланд и ќе игра бараж за СП во Катар
Македонската фудбалска репрезентација ја совлада селекцијата на Исланд со 3-1 и го оствари најдобриот квалификациски пласман во својата речиси 30 –годишна историја на меѓународни натпревари.
Вечерва се играше во грч но сепак Македонија покажа дека е подобар противник од стариот должник од рибарскиот остров и на крилата на Алиоски и расположениот Елмас дојде до посакуваниот успех.
Победата е висока но не беше лесно како што се очекуваше. Добро е што Алиоски рано го отвори резултатот уште во 7. Минута и потоа се одржуваше рамнотежа до крајот на првиот дел.
Почетокот на вториот им припадна на гостите кои ја отворија играта и тоа им донесе израмнување плус уште некоја шанса која беше опомена за избраниците на селекторот Милевски.
Токму во тие минути нашата репрезентација го засили темпото и по една упорна акција Елиф Елмаз донесе ново водство кое во финишот од мечот успеа и да го потврди со својот втор гол за голема победа за Македонија од 3-1 со што го освоивме посакуваното второ место зад големиот фаворит Германија и обезбедивме учество во баражот за мундијалот во Катар.
Според информациите извлекувањето на трите групи во кои ќе учествуваат 10 репрезентации од квалификацискиот циклус и плус две од Лигата на нациите ќе биде на 26 Ноември во 17ч.
СЕкоја група ќе има по четири селекции кои ќе играат полуфинале и финале и само победниците ќе патуваат за Катар.
Тоа е веќе шлаг на тортата за оваа генерација фудбалери која ги отвори портите кон големите натпреварувања уште со настапите во младата репрезентација а потоа и во А- националниот тим со историскиот пласман на Европското првенство и сега во баражот за следното Светско првенство.
Да потсетиме конкуренцијата ќе биде силна бидејќи тука се една Русија, Шведска, Полска, Велс, Шкотска и многу други силни селекции....
-
Зоран Николовски
Сите содржини од овој новинар
-->
-->