Милан нема да го „брка“ Монтела

Поразот од Рома (0:2), сепак, нема да влијае врз работата на Винченцо Монтела, барем според зборовите на спортскиот директор Масимилијано Мирабели.

 

Милан во неделата загуби од Рома на „Сан Сиро“, што за клубот кој вложи 200 милиони евра во засилувања е третиот пораз во седмиот првенствен меч сезоната.

 

„Игравме против одличен тим и доминиравме 70 минути. Бевме егал со противникот, повремено бевме и супериорни, но немавме доволно среќа. Расположението е поинакво во однос на натпреварот со Сампдорија, тогаш пристапот и играта беа поинакви. Ако барате виновник, само напред, но ние мора да бидеме разумни во анализата на натпреварот.

 

Дека Монте е пред отказ, медиумите започнаа да пишуваат по поразот од Сампдорија, а шпекулациите дека тој ќе замине од Милан се засилија откако Карло Анчелоти го напушти Баерн Минхен.

 

„Одигравме само седум натпревари, имаме нов тим, не постои тренер кој има волшебно стапче. Не можеме веднаш да имаме резултати. Имаме нова група фудбалери, која допрва треба да стане тим. Засега не сме загрижени. Монтела работи добро. Не смееме да гледаме во табелата. Рома има тим кој го гради со години, играчите се долго време заедно. Мора да извлечеме позитивни работи од овој пораз“, дополнил спортскиот директор на Милан.

 

Претстојната репрезентативна пауза добро ќе му дојде на Монтела и Милан бидејќи нареден противник во Серија А ќе биде градскиот ривал Интер.