МВР во засилена контрола на лицата во изолација, војската во заеднички патроли со полицијата
Полицијата од денеска строго ќе контролира дали има поголеми собирања по куќи и други живеалишта за кои ќе добие пријави, а оние кои нема да ја почитуваат забраната ќе добијат пријави согласно со Законот за јавен ред и мир.
Последните активности на МВР во насока на спречување на ширењето на коронавирусот ги сподели министерот Чулев, не исклучувајќи ја и мерката за построго ограничување на движењето за граѓаните.
Дополни дека полицијата засега најмногу е концентрирана на контрола на лицата кои се во карантин. Полицијата надгледува над три илјади и 700 луѓе кои треба да се во изолација, а контролите се вршат два пати дневно.
“Од страна на полициските службеници при извршени контроли констатирани се во изминатите 24 часа, едно непочитување за изолација и пет непочитувања на изјавите за самоизолација, додека на територија на државата од страна на полициските службеници се утврдени 27 лица кои требало да бидат во самоизолација, а не се затекнати на адресите на кој што е извршена контролата”
Чулев дополни дека засега нема потреба од свикување на резервниот полициски состав, посочувајќи дека полицијата е во интезивна комуникација со Армијата. Токму оваа соработка беше и тема на утринската прес конференција на началникот на Генералштабот, кој посочи дека војската од утре ќе се најде и пред виталните државни институции.
Целта е растеретување и помагање на полициските сили, кои извршуваат дополнителни активности овој период.
Мерката е донесена согласно со прогласената вонредна состојба во земјава. Слично како и првиот човек на македонската полиција, генералот Ѓурчиновски рече дека резервниот армиски состав засега не е повикан, но е на готовс, доколку е потребна дополнителна мобилизација.
-
Горан Симоновски
Сите содржини од овој новинар