Над 100.000 денари собрани на хуманитарниот концерт во Охрид

Фолк пејачката Елена Велевска заедно со нејзините колеги од македонската естрада синоќа одржаа хуманитарен концерт на Градскиот плоштад во Охрид, за собирање средства за помош на настраданите подрачја зафатени со невремето од минатата сабота.

Охриѓани и туристите можеа да ја покажат својата хуманост донирајќи средства, при што беа собрани над сто илјади денари. Кон акцијата се вклучи и синџирот маркети „Тамаро“ од Охрид донирајќи средства за хигиена, пелени, прехранбени продукти и вода.

На концертот поддржан од Општина Охрид и Општинската организација на Црвениот крст покрај Велевска, која беше иницијатор во акцијата настапија и Наум Петрески, Анастасија Петреска, Боби Мојсовски, Ѓоко Таневски, Татјана Стефановска и Зуица Лазова.

Хуманитарен концерт синоќа во клубот „Кадмо“ одржаа и Тајзи и Спејко кои целиот хонорар и собраните средства од настанот ги донираа за поплавените подрачја.