Намален бројот на работници во индустријата

 Бројот на работниците во индустријата во април годинава е намален за 1,7 отсто во споредба со истиот месец лани, а во првите четири месеци од годинава бележи намалување од 3,1 отсто во споредба со истиот период од минатата година.

Според податоците на Државниот завод за статистика, бројот на работниците во секторот Рударство и вадење на камен во април 2021 година, во однос на април 2020 година, бележи опаѓање од 6,9 отсто, во секторот Преработувачка индустрија има опаѓање од 1,2, а во секторот Снабдување со електрична енергија, гас, пареа и климатизација опаѓање од 3,1 отсто.

Според главните индустриски групи, бројот на работниците во индустријата има опаѓање кај Енергија за 3,9 отсто, Интермедијарни производи, освен енергија за 2,5 и Нетрајни производи за широка потрошувачка за 3,7 отсто, додека пораст има кај Капитални производи за 3,0 проценти и Tрајни производи за широка потрошувачка за 7,2 процента.